ឈើប្រណីតរាប់រយកំណាត់ឈ្មួញលាក់ទុកសមត្ថកិច្ចឆ្លើយដាក់គ្នា
12-August-2016 | ដោយ មែន កំសត់
មណ្ឌលគីរី៖ឈើប្រណីតរាប់រយកំណាត់ដែលក្រុមឈ្មួញបានយកទៅលាក់ទុកត្រង់ចំណុច អូររវាក់ ស្ថិតនៅព្រំប្រទល់ស្រុកស្រុកកោះញែក ខេត្តមណ្ឌលគិរី និងស្រុកលំផាត ខេត្តរតនៈគិរី ។ឈើនោះត្រូវប្រជាពលរដ្ឋរិះគន់អាជ្ញាធរនៃស្រុកទាំង២ថាអត់ចាត់វិធានការបង្ក្រាប ដោយគិតតែមើលបំណាំគ្នាក្នុងការគ្រប់គ្រង់ដែនសមត្ថកិច្ចរៀងៗខ្លួន សង្ស័យពាក់ព័ន្ធនិងផលប្រយោជន៍។
ប្រជាពលរដ្ឋម្នាក់រស់នៅចំណុចអូររវាក់ និងជាម្ចាស់ផ្ទះ ដែលឈ្មួញដឹកឈើទាំងនោះមកលាក់ទុកបាននិយាយថា ឈើទាំងនេះត្រូវម្ចាស់ឈើដឹកដោយរថយន្តមកពីស្រុកកោះញែកមកទុកនៅទីនេះ ដោយជួលដីគាត់ដាក់ក្នុង១ខែតម្លៃ២០០.០០០រៀលតែប៉ុណ្ណោះ។ ម្ចាស់ផ្ទះរូបនោះបន្តថា ជាយូរណាស់មកហើយមិនដែលឃើញសមត្ថកិច្ចណាមកបង្ក្រាបនោះទេ ប្រហែលគេបង់ខែឲ្យសមត្ថកិច្ចអស់ហើយ។
ប្រជាពលរដ្ឋម្នាក់ផ្សេងទៀត ឈ្មោះ សុខ ថា រស់នៅស្រុកលំផាតបាននិយាយថា ក្នុង១ថ្ងៃៗគាត់ឃើញរថយន្តដឹកឈើយ៉ាងហោចណាស់ ក៏មានចំនួន១០គ្រឿងដែរ ដែលរត់ឆ្លង់កាត់មុខតូបគាត់លក់ដូរ។លោកថា ឡានទាំងនោះបើកទាំងយប់ទាំងថ្ងៃតែម្តង ដោយបើកក្នុងល្បឿនលឿនៗណាស់ គាត់ថាមិនដែលឃើញក្រុមសមត្ថកិច្ចចាប់ទេ ឃើញតែសមត្ថកិច្ចដាក់ឡានដេកតាមផ្លូវតែមិនចាប់។
ជុំវិញព័ត៌មានខាងលើ លោក ឈួន សិរីវឌ្ឍន៍ នាយផ្នែករដ្ឋបាលព្រៃឈើស្រុកកោះញែកឲ្យដឹងថា ករណីខាងលើនេះ វាផុតពីដែនសមត្ថកិច្ចរបស់លោកគ្រប់គ្រង់ហើយ។លោកថា នៅចំណុចនោះគ្រប់គ្រងដោយមន្ត្រីបរិស្ថានស្រុកលំផាត់អភិបាលស្រុកកោះញែក លោក ម៉ឺយ សឿន មិនអាចទាក់ទងសុំការបកស្រាយបានទេ ដោយលេខទូរសព្ទរបស់លោកហៅមិនចូល។ដោយឡែក នាយកដែនជម្រកសត្វព្រៃស្រុកលំផាត នៅមិនទាន់ស្វែងរកការបំភ្លឺបានដូចគ្នានៅព្រឹកនេះ។
ចំណែកអភិបាលស្រុកលំផាត លោក នូ ថេ បានអោយដឹងថា លោកទទួលស្គាល់ថាពិតជាមានបទល្មើសកើតមានខ្លះមែន តែអាជ្ញាធរពិបាកនឹងធ្វើការបង្ក្រាបណាស់។លោកបន្តថា បទល្មើសព្រៃឈើមិនមែនកើតតែនៅស្រុកលំផាត់ទេ គឺក្រុមឈ្មួញដឹកមកពីស្រុកកោះញែកខេត្តមណ្ឌលគិរី លោកអះអាងថា ស្រុកលំផាត ដែលលោកគ្រប់គ្រង គ្រាន់តែជា ទីកន្លែង ដែលឃើញតែរថយន្តបើកទៅមកៗមក ដោយយើងគ្រាន់តែសង្ស័យថាមានដឹកឈើតែធាតុពិតមិនឃើញមានគេដឹកឈើនោះទេ៕
ចំនួនអ្នកទស្សនា
- ថ្ងៃនេះ3051
- ម្សិលមិញ11441
- សប្តាហ៍នេះ32881
- ខែនេះ148031
- ឆ្នាំនេះ148031
- សរុប20590487